وقال سامي: "كنت بتكلم مع منى زكي بسلم عليها وقعدت أتكلم معاها شوية، وأدخل من موضوع لموضوع، وبعد ما قفلت سألت نفسي أكثر من سؤال: ليه منى زكي فارقة كتير؟ ليه عندها بريق من نوع خاص؟ ليه هي النجمة الأهم والموهبة الأكبر؟ ليه هي سابقة جيلها بفرق كبير جدًا رغم إن جيلها قوي وفيه زميلات نجوم حقيقيين وموهوبين وناجحين وقدّموا أعمال مهمة، ولكن محدش وصل إنه يبقى منى زكي؟".

وأضاف: "ليه فضلت من أول يوم ليها كممثلة لحد النهاردة أيقونة يصعب تكرارها أو القرب من حجم اسمها ومكانتها على المستوى الفني أو على مستوى النجومية والموهبة أو حب الجمهور؟ ليه منى زكي أكثر ممثلة تصدقها وتتوحّد معاها؟ ليه لو فكرت في ممثلة تلاقي صورة منى زكي هي أول صورة تيجي في بالك؟".

وتابع سامي: "منى زكي مثقفة، متعلمة، راقية، متطورة، مش بتمثل وخلاص ولا بتظهر وخلاص ولا بتتكلم وخلاص ولا مهتمة بتفاصيل الناس الفاضية. ست كلامها مرتب وأسئلتها ليها معنى وهدف، وأنا بتكلم معاها ما بلاقيش لحظة من النقاش دخل في جدل بلا هدف أو كلام من أجل الكلام وخلاص، الست دي وهي بتتكلم عن الفن تحب تسمعها، ولما توصف الفن تفرح إنك تنتمي ليه من طريقة كلامها عنه، لما تناقش معاها أي موضوع تلاقي وعي وحكمة وتحضر وثقافة. ست ناجحة وزوجة وأم ناجحة".

محمد سامي: منى زكي رمز مشرف للمرأة المصرية
وأشار سامي الى تميزها في كل عمل فني قائلًا: "لما تتفرج على أي مشهد ليها بتلاقيها خلته مش عادي، بتشوف تحضير ومذاكرة ورؤية ومجهود واضح وعقل مترتب، وده بيبان في أصغر التفاصيل. بتقدم أي مشهد صعب ببساطة وشياكة من غير تصنّع أو تشتيت، طريقتها في النقد شيك وتبسيطها لصعوبة أدوار عملتها بيدل على ثقتها في نفسها اللي بلا حدود".

وأضاف: "حتى لما نبص للقاءاتها أو لدورها في المجتمع أو كلامها في ندواتها، حتى في الإعلانات اللي قدّمتها أو أفلامها أو مسلسلاتها أو لبسها في أي ظهور ليها حتى لو مش رسمي، هتلاقيها بتعرف تنتقي، وهتلاقي دايمًا في جودة ورمز مشرف للست المصرية".

واختتم سامي رسالته قائلًا: "بجد الكلام على عظمة منى زكي صعب يخلص في بوست، بس حسيت بعد ما قفلت معاها إني عايز أكتب كده من كتر ما استمتعت بالكلام معاها كالمعتاد، يا بخت الفن المصري والعربي بنجمة النجوم منى زكي، ويا بخت كل فنان وفنانة حضرها وانتسب لفترة هي فيها، ويا بخت كل زمايلها اللي من جيلها إنهم من جيل منى زكي، ويا بخت كل ممثلات الجيل اللي بعدها إنهم عندهم منى زكي يتعلموا منها، خاصة إنها جيل أكبر بس عشان بدأت صغيرة إنما مش أكبر منهم سنًا، بالعكس ما شاء الله عليها قمر وفي عز شبابها ومحافظة على شكلها وأناقتها. ربنا يديم على الفن نعمة منى زكي، ودايمًا ناجحة ومتفوقة وبتمتعنا بكل دور بتقدمه وكل مشهد بتأديه. بحبك يا عظيمة ياللي حببتينا ولسه بتحبيبنا أكتر في مهنتنا".

 صورة نشرتها الفنانة على صفحتها بالانستغرام 

 صورة نشرتها الفنانة على صفحتها بالانستغرام 

[email protected]استعمال المضامين بموجب بند 27 أ لقانون الحقوق الأدبية لسنة 2007، يرجى ارسال ملاحظات لـ