‘ رِحلِة خُرافيِّة ‘ - بقلم : سيمون عيلوطي
24-02-2024 18:05:44
اخر تحديث: 03-03-2024 07:53:00
كلَّلوني بِتاج الشَّوك هَدْهَدْني التَّعَب سَمَّموني كاس المُر
سيمون عيلوطي-صورة شخصية
شَعوَطوني باللهَب
هَاللهَب وَلَّع إيديِهن...
قُلت:
نُصِّ المَرجَلِه الهَرَب....
جَرِّيت حالي عا طُرقات
هَالناصرِه الزَّرقا
أسرُق رِحلِتي سِرقَه، ...
مَ دْريت كيف وْليش
أحرَن "حصاني الخَشَب"
وْقِعْت في وادي المَنايا...
لَسْعَتْني بَرقَه
كَبَلَّو لِحصان، قالو هون
تْلوب بالحُرقَه
ما عُدت أسمع غير طَرقَه
جايْ من طَرقَه
وْقاقات شي قُرقَه
حَسِّيت باقيلي عَ الطَّريق
كَمِّن مَرقَه...
يا هايْ آخِر مَرقَه!!
،،،،،،،
صْحيت من هَالغيبِه
عَالنَّاي القَصَب
عا غِنوِتِك، عا طَلِّتِك
من بعد هَالفُرقَه
تْناديني من واحاتِك الحِلوِه، الذَّهَب
تْمِدِّي إيديكي تَنْجَى مِ العَلقَه
تْعَلِّي جُسور... أسمع رَنِّة خَبَب
أشوف جْمال تِجري
فْ صَحرا العَرَب
توخِذني صوب بْلاد تِغري بالفَرَح
فوقها قوس القزح
يْخَلِّصني مِ العَلقَه، ...
تْمَرجَحت ما بين الجُّسور ....
وبين عالَم هَالعَجَب
قُدَّامي تا ألقى الحبيبِه
أقَل من فَشقَه، ...
بْديت أطوي هَالحُزُن
وَانْسى التَّعَب
أنسي الغَضَب
وِقْعَت جْسور المُدُن
غِرقَت سُفُن
ما ظل قُدَّامي غير أكوام الحَطَب
بْقيت أستنَّى وُعودي
بالقصائِد ...والطَّرَب!!...
من هنا وهناك
-
قصة بعنوان ‘سفر بلا عودة‘ - بقلم: الكاتبة اسماء الياس من البعنة
-
‘الجوع والفقر‘ - بقلم: كمال إبراهيم
-
قصة قصيرة : ‘فخٌّ في المقعد الخلفي‘ - بقلم: اسعد عبدالله عبدعلي
-
قصة بعنوان ‘أين المصير‘ - بقلم: الكاتبة أسماء الياس من البعنة
-
موشحات للزيتون بقلم: أسماء طنوس- المكر
-
‘نادي الأحبّة يُعطّر نابلس‘ - بقلم: زهير دعيم
-
‘ شتاءُ الخَير ‘ - بقلم: كمال إبراهيم
-
موشحات ‘يا قُدْسَ الأقداس‘ - بقلم: أسماء طنوس
-
‘عَ النّاصرَة‘ - بقلم: زهير دعيم
-
‘أنا بن غفير‘ - بقلم: هادي زاهر
إعلانات
إعلانات
أرسل خبرا