أسماء طنوس - المكر - صورة شخصية

يا لَوْنَ الْجنايِـن ويا بَسْمِـة زهـــــور --- يا أَمَــــــــل أَخضَــــــر بيغَـــــذّي آمـــــــالـي

بتِبقي على الطُّرُقات إِشـارَة مُـرور --- وِبتِبقي نوري وشمسي تضَوّي كِرمالي

بعيونِكِ الْحُلْـوَه النَّظـراتِ ترويــنـي --- فيهم كَلامُ ﭐلْعِبَـر بِتريـــــــدي تــــهدينـي

                    وأَلْقاكِ في ضَعْفي دَايْمًا تِعينينـي

بعيونِك راحَتـي وِشْعـوري بالأَمــــــان --- وِبغيــبِتِـك عَنّـي أَلْقــــــاكِ في خَيــــــــالـي

أَبْقى الطّفِل الِصْغيـرِعَطولِ الزَّمـان --- وِبتِـــــبقَـى غِنوِتِـــــــــك تِكْتِبــــلـي مـــــــَوّالـي

إِن كان الْجِسِم فاني الرّوح ما بْتِفْنَـى --- بتِفــــــرَح بالأَغــــانـي بتِـــــبـقَـى تِتْغَـــــنَّـى

                      وِالرّوح عَشْقانِه نَغَم وبِتْحِبّ ﭐلْغِنـا

بتِبقي فَرْحِةِ الأيّام وعَروس أَحلامـي --- كُل ما الصَّباحِ طَلّ بتيجي على بالـي

وإن صابني ضَجَر بِتبَدِّدي اوْهامي --- بلاقي مين يشِدِّني ويِرأَف على حالـي

بتبقي الرّبيع الدّايم بمَواسِمُه الْخَضْـرا --- وِبتبقي وُرود الْحُبّ بأَلوانِهــــــا ﭐلْحَمــــرا

                       بتِبقـي لِنا الأَفراح بِتْلَوِّنـي ﭐلْعُمْرا